~عزيمة “المترو”
قرصتني في أول الصباح ..
لتخبرني بأن العزيمة ستكون اليوم بعد الدوام
أرد عليها بغضب “ليش تقرصين” لن أنسى ..!
منذ فترة و هي “تحن”
و لكن الظروف تجبرنا على تأجيل الفكرة .. الى أن أتى اليوم الموعود
لركوب المترو ..
كنا 3 .. كالمجنونات نقفز من مكان لمكان آخر بحثا عن المعلومة
لا أدري لماذا كنا نضحك يومها بهستيرية
نورة كانت تتألم من الكعب العالي
و مشيتها تغيرت و في كل خطوة “يالله بالستر”
الهام كانت غريبة .. “هايبر” زيادة عن اللزوم
بينما هي في الحقيقة هادئة لابعد الحدود
و أنا مستمرة في حالة السرحان
: $
من أسرح “تكفخني” نورة
“مب بيدي” في داخلي شعور من الصعب وصفه
يجمع أمرين .. و ما أن أبدأ بالفلسفة قليلا
تبتسم و أسارع في الضحك
لا أدري لماذا عيناها دائما تبدأ بالضحك معي ..
بدلا من فمها الصغير ..
:
:
وصلنا للمحطة كنا “الشلة البناتية” الوحيدة
و لهذا هجم الجميع حولنا
من الشرطة و من موظفين هيئة الطرق
“أختي هالصوب” .. “أختي تبين تعبين رصيد البطاقة” ..؟
“أي محطة تبون؟”
تصرخ الهام في أذني شكلهم وايد
Helpful
و أنا كنت بريئة ذلك اليوم .. أختبأ خلفهن و لا أود تحمل مسؤولية شيء
بعد انتهائنا من قطع التذكرة
كانت جهتنا محطة خالد بن الوليد ..لأننا سنحط في برجمان
لغاية في نفس الاخت نورة بالدرجة الاولى ..
و بهذا نبدأ الرحلة من محطة الراشدية .. ثم يمر على محطة طيران الامارات
و من ثم المطار تيرمنال 3 ثم تيرمنال 1 ثم محطة سيتي سنتر
ثم الاتحاد ختاما بخالد بن الوليد ..
:
:
كانت المدة تقريبا ثلث ساعة و لو كنا مستقلين السيارة
لكانت ساعة الا ربع .. و يخيل لي بأنهم تفادوا سلبية بطئ المترو
حيث أنه الان سريع .. و يقف بين محطة و محطة “فترة قصيرة” ..
و الأحلى ما في الموضوع .. عند كل محطة ختامية يدخل عمال التنظيف لتجميل عروس دبي ..
“ف الجو ربيع” .. و ليست هناك روائح كريهة
الا اذا وقف أو وقفت بجانبك صاحبة “دابر أملا” ..
اضافة الى ذلك ممنوع الأكل و التدخين في المترو ..و الغرامة 100 درهم
و يتواجد هناك مسؤول مواطن من هيئة الطرق للمراقبة و حفظ سلامة الركاب ..
“والله عفية عليهم” ..
:
:
بما أن الهام “شرجاوية” .. فلا تحلو الجلسة أيضا الا “بالنغزات”
“ها أهل الشارجة ان شاء الله مستانسين؟”
ترد علينا “والله دبي عجيبة.. صدق انها دار الحي” .. “ما أدري متى الشارجة بتسوي لنا مترو”
أرد عليها “هين لا طار الحمار”
: P
:
:
“تسوقت” الأخت الكريمة .. و انتهينا بوجبة العشاء
في
Chilis
بالرغم من كوني في “دايت”
لقد “خسيت” 2 كيلو في غضون اسبوع ..
:
:
كانت الساعة تشير الى الثامنة مساء..
عدنا الى المحطة الرئيسية من بعد يوم شاق
و حافل بالمغامرات الجميلة ..
سيظل هذا التاريخ لوحة رائعة في صفحة الذكريات
21 Oct 09
و “لكن الياهل يوم يفرح بشيء ما يودره بسرعة,, ثاني يوم شاخطين لسيتي سنتر
بالمترو” ..!
; )
:
:
و أنا ملتصقة في نافذة القطار
و عيناي تسرح في مدينتي الخلابة
احترت في أمر ..
هل دبي هي الجميلة؟
أم أنت..
و الى الان أبحث عن اجابة تشفي غليلي !
عموما مبروك عليكم أمطار الرحمة ..
(( سأضيف الصور لاحقا ))
26 أكتوبر 2009 في الساعة 1:03 ص
ايييييييييه
والله حسستيني بالمغامره ههههههه
جان الشارجه يسوون مترو لي طار الحمار
عيل الكويت راح ينطرونا تطلع لنا اجنحه ونطير احنا
عليكم بالعافيه تستاهلون
وانا امس اقول لامي هدف زيارتي دبي المره اليايه راح يكون المترو :”)
26 أكتوبر 2009 في الساعة 2:41 ص
EnjoyeD….. =D
26 أكتوبر 2009 في الساعة 8:45 ص
وااو اليوم في الدوام البنات يتفقون على رحلة بالمترو للستي،،وشكلي بعاير اهل الشارجة وعيمان اللي بيطلعون ويانا!! اهل دبي بعد شونقول شايفين عمرنا ،،
الله يسعد الجميع والكل يجرب المترو
26 أكتوبر 2009 في الساعة 11:13 ص
يااااي وناااسه ^_^…
تعالي ذكرتيني انا و والشلة التعبانه ربيعاتي اتفقنا نركب الميترو بس للحين مالتقينا …
يبالي اذكرهم ..
اقوووول وين المطر !! ف أي كوكب !! نزل عندنا مطر و انا مادري ؟؟؟!!!!!!!!!!!!!!!!!!
وهل يعقل !!!!
بس الظاهر تطرين المناطق الشمالية!! صح ؟ :\
تسلمين يالغلا على هالبوست الغاوي ^_*
27 أكتوبر 2009 في الساعة 11:35 ص
أهــم شيء أستانستي في رحلتكِ مع صديقاتكِ ..
وبمـا أنهم بنوا جامعة الملك عبدالله ,, ما راح نفقد الأمل أنهم يسوون عندنا متروو
الأحلام ببلاش يقولون ..
أرق التحـايا لكِ ..
28 أكتوبر 2009 في الساعة 4:35 ص
ما شاء الله دبي وناسة
يبيله نطلع وياكم
واحلى شي:
صرخ الهام في أذني شكلهم وايد
Helpful
LOOL
وماشالله زين دام في قوانين عن الاكل والتدخين لانهم الي يوصخون الاماكن كلها كرمكم الله
الله يحفظكم وانا اتفق ويا zooz
:P
الله يرحم حالنا بس ويحفظكم
لاحظت ان كل الدول تتمنى يصير عندها ميترو الحين
لا يصير بمتروكم شي الله يحفظكم :p
28 أكتوبر 2009 في الساعة 10:54 ص
ماشالله يعني اقل من نص الوقت .. احب التطور آنه
خطير خطير .. مثير مثير
28 أكتوبر 2009 في الساعة 12:15 م
وانا اقرى الموضوع ..
الحين ابا ايي معاكم مرة 
..
حسيت اني معاكم! ..
بالوصف والكلام وبساطة الطرح ..
خاطري اجرب ..
28 أكتوبر 2009 في الساعة 3:08 م
ماشاء الله طريقه سردج روعه ..
ان شاء الله نركب المترو في يوم من الأيام =)
يعطيج العافيه وفي انتظار الصور ^_||
30 أكتوبر 2009 في الساعة 11:57 ص
اسلوبج حلو فسرد الرحلة ..
خااطري أجرب المترو ..
وإن شااء الله جرريب
تقبلي مروري
31 أكتوبر 2009 في الساعة 9:05 م
صباح كل ورود هولنده
وبس
بابل
1 نوفمبر 2009 في الساعة 2:37 م
عقبال ما يكون عندنا متروو
ومبروك عليكم المترو تكسرونه بالعافيه << فاهمه الموضوع غلط
2 نوفمبر 2009 في الساعة 12:17 ص
افااااا
والا السالفه طلع فيها معاير يعني ها
ههههههههههههه
اهم شي انج استانسيتي
عن نفسي بعدني ما خضت هالتجربهلين الحين
بس ناويه ان شا اللهاسويها عما قريب:)
4 نوفمبر 2009 في الساعة 1:13 ص
ZooZ العزيزة
خخخخ ضحكتيني .. ان شاء الله تخترعون شيء
أكبر من هذا ..
حياكم الله .. و الله يحفظ ماماتج يا رب ..
نورتي !
4 نوفمبر 2009 في الساعة 1:13 ص
ME
; )
!!
4 نوفمبر 2009 في الساعة 1:19 ص
أختي انسانه
ها سرتوا ..؟
بشري
: )
4 نوفمبر 2009 في الساعة 1:21 ص
عواشي الغالية
يبالج الصراحة .. هي صوبهم ..
بس تمتعت في مشاهدة الصور أنا ..!
يالله جريب الجو يتغير ..
لا تنسين البوت و البالطو .. خو ربعنا يشردون البرد !
نورتي يا ستي !
4 نوفمبر 2009 في الساعة 1:22 ص
العزيزة Pen
حلو التفاؤل .. لا توقفون ..!
: )
منورة يا أختي !
4 نوفمبر 2009 في الساعة 5:33 م
عدتي والعود احمد كما يقولون ..
شوقتيها يادبي انا نزور دبي بس عشان ناخذ لنا لفة في هالمترو
عودا حميدا ,, اسعدتني عودتك بقدر ما ني زعلان اني اخر من يعلم
وبخصوص التعليق ترا ماوصلني شي
انتظرك في مدونتي
4 نوفمبر 2009 في الساعة 11:07 م
مي الحبيبة
عيونكم باردة “أدري”
: )
ان شاء الله نسمع أخبار حلوة منكم ..
قولي آمين؟
و ان شاء الله بعد نتلاقى !
قولي آمين؟
فديتج !
4 نوفمبر 2009 في الساعة 11:08 م
ورق مخطط الغالية
هي والله ..
أدريبج .. من هواته ..
و ان شاء الله بعد نسمع أخبار حلوة من البحرين !
: )
4 نوفمبر 2009 في الساعة 11:09 م
lil.D
عزيزتي .. أفا عليج .. نلفج ويانا ..
أنتي بس تامرين !
: )
4 نوفمبر 2009 في الساعة 11:09 م
لوست
أهلا وسهلا ..
على راسي والله ..
شرفتينا !
4 نوفمبر 2009 في الساعة 11:10 م
سمو الأميرة
أهلا وسهلا ..
على راسي والله..
شرفتينا!
4 نوفمبر 2009 في الساعة 11:11 م
بابل الغالي
صباح أحلى من طعم كل كاكاوهات بلجيكيا !
: )
4 نوفمبر 2009 في الساعة 11:12 م
أختي حلمي الغالية
خخخخخخ
صبري بعد سنة بس بسير أصور الوضع الداخلي
و بخبرج !
شرفتينا و نورتينا !
4 نوفمبر 2009 في الساعة 11:13 م
اقصوصه
خخخخخ .. بس على راسي انتوا والله ..
يالله خبرينا مب تنسين !
شرفتينا !
4 نوفمبر 2009 في الساعة 11:43 م
قسوي
D :
حتى طرشت ايميل “شو السالفة”؟!
نورت المكان كله والله ..
و لنا لقاء ان شاء الله ..!
حياك الله
5 نوفمبر 2009 في الساعة 7:03 ص
بعد ما شفت الصور ..
طرأ على بالي الشعور بالشيء (الجديد) .. (التجربة الجديدة) ..
مثل علبة النسكافيه لما يتم فتحها لأول مرة .. تكون ريحتها نفاذة ..
هذا الشعور هو أمتع لحظة في كل التجربة ..
موفقين إن شاء الله
6 نوفمبر 2009 في الساعة 2:50 ص
اللاااااااااي .. حلوة الرّحلة وحماااس
من متى خاطري أركبه بس يوم اخبر ربيعاتي عن الفكرة
ماشوف ملامح تحمس خخ ..!
شجعتيني صراحة ،
ورحلة حلوة ،
بس أي مطر ؟ مايانا شي نحن : (
بالتوفيييق .. ،
7 نوفمبر 2009 في الساعة 10:12 ص
Safeed
لا لا نوتيلا .. صح؟ يوم تبطل الراس ..أيبااااه ..!!
خخخخ
نورت يا اخوي !
7 نوفمبر 2009 في الساعة 10:41 ص
antigone09
أهل الشمال ياهم !
خخخخ
يبالج الصراحة .. رحلة العمر يسمونها !
مرحبا و سهلا نورتي !